63. kongres FUEN w Zapadnej Friziskej zahajeny
Ljouwert (SN/bn). „Dźakuju so wšěm, kotřiž su iniciatiwu Minority SafePack podpěrali a podpisali. Prěni raz su mjeńšiny Europy, žadace sej swoje prawa, zhromadnje jednali. Naš dotal najwjetši nadawk je so z našim dotal najwjetšim wuspěchom stał!“ Z tutymi słowami je prezident Federalistiskeje unije europskich narodnych mjeńšin (FUEN) Loránt Vincze wčera w friziskim měsće Ljouwert – nižozemsce Leeuwarden – 63. kongres FUEN zahajił. Do toho bě měšćanosta kulturneho a administratiwneho centruma Zapadnych Frizow Fred Crone cyłkownje wjace hač 120 wobdźělnikow kongresa w lětušej kulturnej stolicy Europy witał. Slědowachu postrowy předsydy rady friziskeho hibanja Gearta Benedictusa, pósłanca generalneho sekretara Organizacije za wěstotu a zhromadne dźěło w Europje (OSZE) Paula Bekkersa, pósłanca Madźarskeje w Nižozemskej Andrása Kocsisa, społnomócnjeneho zwjazkoweho knježerstwa za naležnosće wusydlencow a narodnych mjeńšin Němskeje prof. dr.