Bamž Franciskus a prezident Steinmeier zhromadnosć a dialog pominałoj
Radwor/Budyšin/Chrósćicy (SN/bn). Wjetšina katolskich a ewangelskich Serbow je tež lětsa znowa měrne a spokojne hodowne dny přežiwiła. Kaž w minjenych lětach su wjacore kulturne cyłki Bože mšě na wosebite wašnje wobrubili. W Radworju zaspěwa po tradiciji tamniši chór Meja pod nawodom Pětra Cyža. W Chrósćicach wuhotowachu dźěći program a pokazachu žłobikowu hru. Prěni raz wukonještej Katka Baierowa a Alena Hiccyna wuměłski nawod. W Budyšinje zanjese do liturgije měšany kwintet pod nawodom Michała Jancy chórowe kompozicije, nimo toho hudźeše duwo trompetarjow. Krótkodobnje běchu spěwarki zhromadnje z ministrantami choral nazwučowali, z kotrymž hodowne poselstwo spěwajo sposrědkowachu.