Bajkowy klasikar „Mały Muk“ na serbskim šulerskim jewišću
Budyšin (SN/bn). Serbske dźěćace dźiwadło Němsko-Serbskeho ludoweho dźiwadła je wčera swoju nowu inscenaciju „Mały Muk“ prěni raz předstajiło. Młodźi hrajerjo su sej z adapciju bajki Wilhelma Hauffa sylny a dołho trajacy přiklesk přihladowarjow na nimale wupředatej wulkej žurli Budyskeho Dźiwadła na hrodźe zawěrno zasłužili.
Do premjery witaše zastupjerka intendanta za serbske dźiwadło Madleńka Šołćic přihladowarjow a wuzběhny: „Wosebje dźakujemy so staršim, kotřiž dadźa swojim dźěćom na serbsku šulu chodźić a tam serbšćinu wuknyć. Dźensa wospjet dožiwjamy, z kajkim wjeselom holcy a hólcy zhromadnje dźiwadło hraja, wšojedne, hač su maćernorěčni abo hač su serbšćinu hakle w šuli nawuknyli. Za to wulku chwalbu!“