Swjatočne wotkryće, trójna premjera a trójna „Sława“ w Liberecu

Liberec (SN/bn). „Lěto Łužiskich Serbow w Liberecskim kraju“ je zahajene. Hač do kónca lěta 2020 wuhotuje towarstwo Societas Amicum Liberec (SAL) z wjacorymi partnerami – mjez druhim su to Towarstwo přećelow Serbow, město kaž tež wokrjes Liberec a Domowina – dohromady 33 zarjadowanjow, wobswětlace stawizny a kulturu Serbow. Wu­cha­dźišćo akcije je róčnica před 70 lětami zało­ženeje Liberecskeje wotnožki Serb­skeho gymnazija. Składnostnje toho připrawjena wopomnjenska tafla při zachodźe bywšeho Lyceja Františeka Xavera Šaldy – dźensa je tam dźěl Techniskeje uniwersity Liberec (TUL) zaměstnjeny – bu minjeny pjatk wotkryta.