Wjace serbskorěčnych filmow z dlěšim hrajnym časom žadanych

Choćebuz (SN/CoR). Něhdźe 120 ludźi dožiwi wčera wječor we wobłuku 29. Choćebuskeho filmoweho festiwala premjeru delnjoserbskeje dokumentacije „Zhubić a namakać“ Romana Pernaka w tamnišim „Obenkino“. Połhodźinska produkcija za telewizny magacin Łužyca, kotraž bu hakle dźeń do toho dočinjena, zaběra so ze wšelakorymi pućemi, kak sej ludźo dźensa serbsku identitu w Delnjej Łužicy tworja. Za třoch ze štyrjoch protagonistow filma – su to šefredaktor Noweho Casnika Gregor Wieczorek, wučerka na Delnjoserbskim gymnaziju Colett­ Šampatisowa, linguist dr. Patrick Steinkrüger a čołmar Hagen Conrad – njeje serbski pochad, ale wosobinska motiwacija wuchadźišćo, zo serbsce rěča a so za serbstwo angažuja. Za jeničkeho, kiž pochadźa ze serbskeje swójby, njeje tajka identifikacija móžna. Optimizm filma­, kotryž nowe puće za přichod delnjoserbskeje identity a rěč pokazuje, přewa­žowaše tež na diskusiji po předstajenju.