Sernjany swjeća lětsa 600. róčnicu prěnjeho pisomneho naspomnjenja. Rodźeny­ Sernjančan a dobry znajer stawiznow­ delanskich wsow Pawoł Rota­ je někotre stawizniske­ zajimawostki wo wsy zestajał, kotrež čitarjam Serbskich Nowin we wjacorych­ dźělach spřistupnjamy:

„Kozace mloko“

Słowaksku ludowu wjeselohru w třoch jednanjach spisa Jan Skalka. W njej dźe wo socialistiske přetworjenje ratarstwa, kotrež so za čas předstajenja pola nas w Němskej demokratiskej republice ze wšěm wotmachom předobywaše.

Wot pózdnjeho lěća 1959 so młodźi dźiwadźelnicy ze Sernjan a z Róžanta z rólemi zaběrachu. Něhdźe 50 wječorow běchu ze swojim nawodu Jurjom Wowčerjom zwučowali. Jurij Kostorž jako swěrny kmót wjesnych lajskich hrajerjow jich pilnje podpěrowaše.

Trójce naši dźěławi dźiwadźelnicy z „Kozacym mlokom“ wustupichu: na župnej delegatnej konferency Domowiny w Pančicach, 25. februara 1960, kaž tež póstnicy njedźelu a póndźelu, 28. a 29. februara 1960, w Sernjanach před dohromady něhdźe 460 wopytowarjemi.