Kapała Horjany pola Dinarjec w Nowoslicach slěborny jubilej swjećiła

Wšitcy lubowarjo dujerskeje hudźby dožiwichu spočatk nowembra wosebity dźeń. Serbska dujerska kapała Horjany přeprosy na njedźelne rańše piwko k Dinarjecom do Nowoslic, zo by zhromadnje z přiwisnikami, přećelemi a přiwuznymi 25. róčnicu swojeho załoženja ­swjećiła.

Kaž je dawno hižo z dobrym wašnjom, njestrowješe fanowy klub kapału jeno ze swojimi chorhojemi w serbskich barbach, ale tež z mócnym aplawsom. Uwe Macka a Jan Neter witaštaj hosći na kopatej połnej žurli a wjedźeštaj na lóštne wašnje dwurěčnje po programje.

Spočatnje spominachu na wšěch tych, kotřiž su hudźbnikow w dźěćacych lětach k hudźbje wjedli, kaž běchu to Chróšćanski kantor Handrij Wjenk, komponist Alfons Janca abo šulski direktor Jurij Kurfürst. Bjez jich zapala a zahoritosće njeby zawěsće škrička lubosće k dujerskej hudźbje přeskočiła. Wšako njebě tež tehdy w NDR we wosomdźesatych lětach samozrozumliwe, zo so dźěći a młodostni za dujersku hudźbu horja.