Z dobyćom do zymskeje přestawki

štwórtk, 12. decembera 2019
artikl hódnoćić
(0 )
Koparjo druheho mustwa Chróšćanskeje SJ wjesela so w domjacej hrě nad wose bitymi wrotami   Michała Wowčerja (naprawo, Chrósćicy).  Foto: Konstantin Hrjehor Koparjo druheho mustwa Chróšćanskeje SJ wjesela so w domjacej hrě nad wose bitymi wrotami Michała Wowčerja (naprawo, Chrósćicy). Foto: Konstantin Hrjehor

SJ Chrósćicy II

– ST Módro-běli Minakał 5:3 (3:0)

Zestawa domjacych: B. Klimant – M. Donat, Šiman (50. Mark), Bětnar, Wowčer, L. Zahrodnik (65. Jakubaš), G. Zahrodnik, Domaška, J. Donat, Liznar (90. T. Klimant), Žur

Na poslednim hrajnym dnju wokrjesneje ligi, stafle 2 witaše koparska rezerwa Chróšćanskeje SJ mustwo z Minakała. Wuhlad na dohromady 20 dypkow po prěnjej połseriji a sylna zestawa domjacych zbudźištej w rjadach přiwisnikow SJC nadźiju na dobyće. Na roz­tep­tanym trawniku pak pokazachu hrajerjo w prěnich mjeńšinach jenož mało rjanych akcijow, špatne přihrawki so ko­pjachu. Njezadźiwa tuž, zo přińdźechu Chróšćenjo skerje připadnje a z wulkej pomocu hosći k prěnjemu strašnemu wotzam­knjenju, kotrež wjedźeše k 1:0. Michał Wowčer połoži sej krótko za srjedźnej liniju bul na prawu nohu a chcyše sobuhrajerjow w přećiwniskej šěsnatce z wysokej přihrawku posłužić. Kulowata koža pak měrješe so runu smuhu na wrotarja, kiž hrajny nastroj z njezbožownym pohibom do swójskeho saka wjedźeše (5.). Na dalše strašne wotzamknjenja pak dyrbjachu přihladowarjo zaso dlěje čakać, dokelž rozsudne přihrawki cil často njedocpěchu. Domjacy mějachu trochu wjace wot hry a jewjachu so po poł hodźinje tež časćišo před wrotami Minakałčanow. W 37. min. měrješe so Józef Donat z dołhimi kro­kami sam na přećiwniskeho wrotarja a zbě­hny bul z wulkotnej techniku k 2:0 do syće (37.). Najsylnišu fazu domjacych skrónowa Lucian Zahrodnik jenož dwě mjeńšinje pozdźišo, jako po rjanej kombinaciji z lěweje strony do dołheho kuta k 3:0 přetwori (37.).

W druhim połčasu změrowachu so Chróšćanscy koparjo najprjedy z někotrymi połojčnymi móžnosćemi. Tak hosćo hru dale a bóle kontrolowachu a so časćišo před wrotami Bosćija Klimanta pokazachu. Wosebje po róžkach so w šěsnatce domjacych paleše. Tak bě logiski wuslědk, zo so Minakałčanam w 67. min. poradźi na 3:1 skrótšić. Krótko po tym docpěchu po nadběhu přez prawy bok a po zmylku škitarja 3:2. Přećiwnik hru postajowaše a tłó­češe na wurunanje, kotrež so jemu z rjanej třělwu pod łatu samo­ tež poradźi (79.). Nětko hosćićeljo skónčnje spóznachu, zo by jara mjerzace było, bychu-li po jasnym nawjedowanju prěnjeho połčasa tajkich njetrjebawšich wrotow dla hišće dypki wotedali. Hněwnje startowachu nadběh po nadběhu, a najrjeńši wjedźeše potom tola k wolóžacemu 4:3. Michał Donat posłuži z wulkotnej dołhej třělwu Měrćina Jakubaša, kiž so do šěsnatki předrě a kulowatu kožu Józefej Donatej přihra. A tón z krótkeje distancy přetwori. Hosćo so podachu, a tak móžachu domjacy hru měrnje a koncentrowanje dohrać. Z wothwizdanjom so Simonej Žurej samo hišće 5:3 poradźi.

Koparska rezerwa Chróšćanskeje SJ rozžohnuje so tuž z 20 dypkami a dobrym 8. městnom w tabulce do zymskeje přestawki. Klemens Mark

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND