Erfurt (dpa/SN). Po skandalu při wólbach durinskeho ministerskeho prezidenta chce CDU w Durinskej móžnosće parlamentariskeho nowozapočatka pruwować. Dyrbjało-li to zwrěšćić, su nowowólby njewobeńdźomne, kaž je předsydka CDU Annegret Kramp-Karrenbauer minjenu nóc po wjacehodźinskich wuradźowanjach w Erfurće zdźěliła. To rěka, zo chcyła wona durinskemu krajnemu předsydźe Mikej Mohringej zmóžnić, bjez nowowólbow a z nimi zwjazanych wočakowanych stratow za křesćanskich demokratow wuslědk wólbow ministerskeho prezidenta korigować. CDU bě srjedu zhromadnje z AfD politikarja FDP Thomasa Kemmericha do zastojnstwa ministerskeho prezidenta woliła, štož je wótre kritiki zbudźiło. Prezidij CDU bě sej hišće samsny dźeń nowowólby žadał. Kemmerich je wčera, dźeń po wuzwolenju, swój wotstup připowědźił. Do toho bě zwjazkowy předsyda FDP Christian Lindner do Erfurta přijěł a z nim rěčał.