Spektakularny rozsud BASF

štwórtk, 13. februara 2020
artikl hódnoćić
(0 )

Chemijowy koncern chce w Carnym Gózdźu baterije za e-awta twarić

Ludwigshafen/Podstupim (SN). Chemijowy koncern BASF chce w swojim zawodźe w Carnym Gózdźu (Schwarzheide) nowu produkciju za baterijowe materialije natwarić. Tam chcedźa předprodukty finskeje wotnožki BASF předźěłać, předewzaće wčera w swojej centrali w Ludwigshafenje zdźěli. Po informacijach medijow planuja při tym inwesticije 500 milionow eurow.

W Carnym Gózdźu chcedźa baterije twarić, z kotrymiž móža něhdźe 400 000 elektroawtow wob lěto wuhotować. Nowa připrawa ma dźěl wjaceschodźenkoweho inwesticiskeho plana za natwar cyłoeuropskeje syće za produkciju elektroawtow być. Wo planach za natwar baterijoweje produkcije běchu loni prěni króć rozprawjeli. Pozadk zasydlenja je rozsud komisije EU, po kotrymž móhła so produkcija baterijow z najwjace 3,2 miliardomaj eurow spěchować. Na projekće wobdźěla so sydom krajow. Němska smě najwjace 1,25 miliardow eurow dóstać. W lěće 2022 chcedźa prěnje baterije twarić.

Ministerski prezident Braniborskeje Dietmar Woidke (SPD) rjekny: „Smy so intensiwnje za to zasadźeli, zo BASF produkciju baterijow w Carnym Gózdźu zaměstni. Dźakuju so wšitkim wobdźělenym, wosebje zarjadej za hospodarske spěchowanje. Runje w tutych dnjach z wobzamknjenjom zwjazkoweho knježerstwa nastupajo skónčenje zmilinjenja brunicy je to přewšo dobra powěsć. Je to zdobom wažny přinošk, industrijne dźěłowe městna w regionje zachować a nowe wutworić.

Braniborski hospodarski minister Jörg Steinbach (SPD) je sej wěsty, zo so z inwesticiju industrijny zakład Łužicy skruća a zo změje region ze zawodom tež technologiski předskok. „Nowe lěto so tak započina, kaž je so stare skónčiło: ze spektakularnym rozsudom mjezynarodneho koncerna na dobro braniborskeho hospodarstwa“, Steinbach rjekny.

Zwjazkowy minister za hospodarstwo Peter Altmaier (CDU) rozsud BASF na dobro inwesticijow w Carnym Gózdźu tohorunja wita. „Je to sylny signal za region a za přichod Němskeje jako kraj awtotwarcow. Carny Gózd je dźěl prěnjeho zhromadneho europskeho projekta za twar baterijow“, wón rjekny.

Na projekće wobdźěla so nimo Němskeje hišće Francoska, Belgiska, Finska, Italska, Pólska a Šwedska. W najwjetšim chemiskim zawodźe Braniborskeje w Carnym Gózdźu dźěła 3 500 ludźi.

wozjewjene w: Politika
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND