Kajki je to zaso trend? Tole so hišće před něšto časom prašachmy, jako wuhladachmy w socialnych medijach fota, na kotrychž běchu ludźo z pisanym škitom na hubje a nosu widźeć. Tež we Łužicy je dźeń a wjace ludźi ze škitom na hubje po puću. Šwalča Petra Kupcyna tajki za ludźi šije. Designeraj Štefi a Šćěpan Hanušec pokazujetaj nětko na swojej internetnej stronje SerbskiKonsum wariantu w módroćišću.
W Budyšinje widźach před wjace hač třomi tydźenjemi młodu žonu aziskeho pochada na Schillerowych zelenišćach z tajkim škitom a zańdźeny tydźeń dalšu žonu słowjanskeho pochada w kupnicy. Sama sym mjeztym tež z jednorej wariantu po puću, a kaž naspomnjenej žonje tohorunja rukajcy nošu. Spočatnje sej myslach, zo ludźo ze spodźiwanjom na mnje hladaja, ale ničo. W drogeriji rjekny předawarka mužej, kiž tam na te wašnje škitany nakupowaše, zo měł sej hišće rukajcy tyknyć. A na parkowanišću sedźeše staruška w awće, kotraž je sej škit runje na hubu a nós sćahnyła, prjedy hač je do wobchoda šła.
