Braniborska Serbska rada korony dla swoje stejišćo zapozdźene zapoda

Choćebuz/Podstupim (SN/at). Nowe serbske šulske postajenje w Braniborskej tamnišu Radu za naležnosće Serbow dale jara zaběra. Njeje pak pytnyć, hač docyła doprědka dźe. Tohodla je so zapósłanča Kathrin Dannenberg (Lěwica) w ertnym naprašowanju na 16. posedźenju krajneho sejma Braniborskeje na přisłušnu ministerku za kubłanje, młodźinu a sport Brittu Ernst (SPD) wobroćiła.

We wotmołwje ze 14. meje rysuje ministerka Ernst tuchwilny staw a wočakowacu poziciju ministerstwa w tej za delnjoserbske šulstwo bytostnej naležnosći. Naspomnjena je konstruktiwna rozmołwa ze zastupjerjemi nowowuzwoleneje serbskeje rady a Domowiny w ministerstwje 2. měrca. Tam dojednachu so, „radźe hač do 5. meje 2020 składnosć dać so k naćiskej postajenja wuprajić, prjedy hač wobdźělensku proceduru we wobłuku knježerstwa zahaja“. Zdobom ministerka zwěsći, „zo hač do dźensnišeho dnja stejišćo rady hišće njepředleži“.