Serbski ewangelski cyrkwinski dźeń znowa wusahowacy nabožny wjeršk był
Wojerecy (SN/bn). „Dźakuju so za rjane, rjane kemše tu we Wojerecach, dźakuju so wšěm, kotřiž su zahe stanyli, so přihotowali a w serbskej drasće přišli, a to z cyłeje Łužicy. Wutrobny dźak za wšitko!“ Takle je so superintendent Jan Malink wčera na kóncu 74. serbski ewangelski cyrkwinski dźeń zahajaceje Božeje słužby we Wojerowskej Janskej cyrkwi z přitomnymi rozžohnował. Do toho bě Malink swjatočne kemše zhromadnje ze swojim naslědnikom w zastojnstwje superintendenta, fararjom Christophom Rummelom z Hodźija, ze Slepjanskej fararku Jadwigu Malinkowej a prěni raz na cyrkwinskim dnju wobdźělenym fararjom Stefanom Reicheltom z Blunja swjećił. Boži dom bě – dalokož strowotniske předpisy to dowolachu – nimale dospołnje wobsadźeny. Přiwšěm Jan Malink podšmórny, zo aktualneje krizy dla jedyn z „cyle wosebitych wjerškow lěta za serbskich wosadnych“ regiona „lětsa po zwučenym wašnju swjećić njemóžemy, njebudźe žaneje hosćiny a zhromadneje zabawy“.