Po sylnym boju prěnje tři dypki

wutora, 15. septembera 2020
artikl hódnoćić
(0 )
Koparjo ST Marijineje hwězdy kaž tež hosćo z Łaza/Běłeho Chołmca klakachu so do kóždeho dwuboja. Domjacy pak mějachu zbožo na swojim boku a su hru z najsnadnišim wšěch wuslědkow dobyli.  Foto: Konstantin Hrjehor Koparjo ST Marijineje hwězdy kaž tež hosćo z Łaza/Běłeho Chołmca klakachu so do kóždeho dwuboja. Domjacy pak mějachu zbožo na swojim boku a su hru z najsnadnišim wšěch wuslědkow dobyli. Foto: Konstantin Hrjehor

ST Marijina hwězda – HZ Łaz/Běły Chołmc 1:0 (1:0) 

Zestawa domjacych: O. Schmidt – Pesch­mann, Zelnak, R. Hawš, R. Cyž, Eldor, P. Schmidt, O. Hawš, Ch. Cyž (81. T. Jurš), Pakoßnick (67. Langer), (73. Čornak), D. Jurš

Po tym zo dyrbjachu koparjo 1. mustwa ST Marijineje hwězdy poł lěta na swoju prěnju winowatostnu partiju čakać, wjeselachu so woni na zazběhowu hru wo­krjesneje wyšeje ligi pjatk, 4. požnjenca, w Porchowje. Ale tež tutón duel padny do wody, dokelž mějachu koparjo domjacych pad korony. Tak móžachu chowancy trenarja Boda Pjetaša hakle minjenu njedźelu do noweje sezony startować. Doma wočakowachu na swójskim trawniku postupnika z Łaza/Běłeho Chołmca. Wot wšeho spočatka běše duel jara bojowniski a wotměwaše so skoro jenož mjez šěsnatkomaj z horcymi dwubojemi w srjedźnym polu. Prěnju wulku składnosć mějachu domjacy w 4. min., jako so kapitan Jakob Pakoßnick tróšku zbožownje bula dótkny a so mócnje do šěsnatki předrě, ale wrota snadnje misny. Hosćo mějachu hrajersku přewahu, klóšterski cyłk pak agěrowaše koncentrowanje a w defensiwje wěsće steješe. Najebać to skićeše so Łazowčanam po wurjadnej kombinaciji w 21. min. dobra šansa. W poslednim wokomiku móžeše domjacy škit strašnu situaciju wotwobarać. W 31. min. fanojo Marijineje hwězdy juskachu. Po dołhim zamjeće Falka Pesch­manna podlěši Pakoßnick třělwu z hłowu eksaktnje do běha Chrystofa Cyža. Tón so sylnje přesadźi a zaměstni kulowatu kožu z dźesać metrow nisko do praweho kuta k 1:0. Zbywacy čas do přestawki słušeše přewažnje hosćom kiž běchu wosebje přez standardy strašni. Tak knježeše po róžku wulki tohuwabohu před wrotami Olivera Schmidta, kiž pak móžeše scenu wujasnić. A tři mjeńšiny pozdźišo dyrbješe wón znowa cyłu swoju mišterskosć pokazać, jako po dalšim róžku na prawym blaku steješe a z wušiknej paradu wurunanju zadźěwa.

Spočatk druheho połčasa so wjele naspomnjenjahódneho njesta. Łazowčenjo łakachu na zmylki domjacych. Přeće pak jim Pančičenjo njespjelnichu, ale dale solidnje a koncentrowanje hrajachu. Dobry natwar we woběmaj cyłkomaj w tej fazy njenasta, a sudnik dyrbješe partiju wjele foulow dla husto přetorhnyć. Tak nasta prěni wjeršk w druhej połojcy hakle w 75. min. Tu bu Ali Eldor po dokładnej přihrawce Chrystofa Cyža do směra přećiwniskich wrotow pósłany, ale samlutki před nimi zwrěšći. W poslednich mjeńšinach tłóčachu hosćo hišće jónu jara mócnje na kašćik Schmidta. Po najrjeńšim nadběhu hry mějachu woni w 89. min. najwjetšu móžnosć wurunać: Hrajo jara spěšnje přez swoju lěwu stronu namakachu w šěsnatce swobodnje stejaceho sobuhrajerja. Město toho zo by hnydom z jědnaće metrow na wrota třělił, chcyše wón bul hišće přiwzać. W tym wokomiku pak běše domjacny škit na městnje a móžeše łoskoćiwu situaciju sporjedźeć. Po štyrjoch mjeńšinach přidatneho hrajneho časa wothwizda sudnik Laurens Hahn partiju, a hrajerjo ST Marijineje hwězdy móžachu so nad prěnimi dypkami sezony 2020/2021 wjeselić.

Facit: Bě to měšeńca bojowniskeho wukona, taktisce klewerneho hraća a w někotrych situacijach tež tróšku zboža. Pod smužku pak bě dobyće zasłužene.

Tobias Nowak

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND