Foto: SN/Hanka Šěnec
Adwent je wosebity čas, na kotryž so kóžde lěto wjeselimy. Z adwentom zwjazujemy tójšto nałožkow, kotrež po starej tradiciji hajimy. Kruće zwjazany z dohodownym časom je adwentny wěnc. Tajki wěnc njewuhladamy jenož w bydlenjach, pěstowarnjach a šulach, ale tež w běrowach, zawodach, kupnicach atd. Z jehlinowych hałžkow nawity a z čerwjenym banćikom wobwity wuprudźa wón wšudźe dohodownu atmosferu. Štyri swěčki na wěncu symbolizuja štyri adwentne njedźele a dźěla čas wočakowanja do wotrězkow.