Lěto wob lěto zhubja serbski lud swěrnych přećelow we wukraju. A to w času, hdyž jich runje solidarnych poboku trjebamy. Minjenu njedźelu je w starobje 67 lět Jaromír Kohlíček po ćežkej, dlěje hač lěto trajacej chorosći zemrěł.
Serbja zeznachu čěskeho přećela nanajpozdźišo za čas Chróšćanskeho zběžka, jako bě so do cyłka bojownikow přećiwo zawrjenju serbskeje srjedźneje šule zarjadował. Swój hłós je tež w parlamenće Čěskeje republiki pozběhnył, w zjawnosći za serbske šulstwo wojował a so sam gratu přimał: při barbjenju šulskeho twarjenja w Chrósćicach. Foto z politikarjom w molerskej monturje pokazuje Jaromíra, kajkiž bě: konstruktiwny, wjesoły při dźěle, pomocliwy druhim napřećo.