Duchowni namołwjeja wěriwych, sej žro Božeho naroda wuwědomić

Chrósćicy/Kulow/Choćebuz/Rom (SN/bn). Duchowni, ministrantki a ministranća z nahubnikom a žadyn wot wosady zanjeseny „hrimotacy kěrluš ‚Hej, pastyrjo, hej‘“, kaž farar Měrćin Deleńk we wobłuku Božeje mšě patoržicu w Chróšćanskej farskej cyrkwi wobžarowaše – tak hodźała so lětuša Boža nóc z wida katolskich wěriwych w Hornjej Łužicy zjimać. Přiwšěm běchu cyrkwje połnje wobsadźene, znajmjeńša dalokož hygieniske předpisy to dowolachu. Wjetšina kemšerjow pak sćěhowaše swjatočnosće składnostnje naroda Jězusa wotdoma online abo za radijom. Tak wobhladachu sej livestream z Chrósćic na platformje Youtube zdźěla hač do 500 wužiwarjow resp. domjacnosćow, Boža mša w Kulowskej farskej cyrkwi přiwabi přerěznje 120 digitalnych wopytowarjow.