Jednaćel LND z prěnjej lětnej bilancu swojeho skutkowanja spokojom
Budyšin (SN/CoR). Digitalizacija je tež w Ludowym nakładnistwje Domowina za čas lockdowna loni dźeń a wjetšu rólu hrała. Tak su w decembrje dwójce telko internetnych skazankow zwěsćili kaž lěto do toho. „Móžnosć, sej knihi a medije w našim online-shopje skazać, njewužiwaja jeno Serbja zwonka Łužicy, ale dale a bóle tež wottud“, zwěsća jednaćel LND Syman Pětr Cyž. Z prěnjej bilancu swojeho skutkowanja na čole serbskeho nakładnistwa je wón spokojom. „Wosobinsce chcu rjec, zo su mi sobudźěłaćerki a sobudźěłaćerjo jara pomhali so zadźěłać, a to pod wobćežnymi wuměnjenjemi korony. Často bě trjeba spěšnje rozsudźić. Z pomocu přistajenych sym problemy zmištrował, a za to sym dźakowny.“