Nowa debata wo móžnosćach domjaceho dźěła w koronakrizy
Frankfurt n. M. (dpa/SN). Zwjazkowy minister za dźěło Hubertus Heil předewzaća doraznje napomina, přistajenym w tuchwilnej koronakrizy domjace dźěło zmóžnić. „Swojowólnje homeoffice zapowědźić by nětko njezamołwite było“, rjekny politikar SPD sćelakej NDR Info. Zdobom wón připowědźi, zo chce swój apel předewzaćam na dźensnišej konferency ze zastupnikami personalnych wotrjadow wjacorych wulkich firmow potwjerdźić.
Hdźež domjace dźěło móžne njeje, měli předpisy hygieny kruće dodźeržeć, minister dale praji. Hewak njemóhł wón wuzamknyć, zo dyrbja zawody produkciju přetorhnyć. Lockdownej wšeho hospodarstwa pak chcył wón na kóždy pad zadźěwać. Jemu dźe wo to, „zo naše hospodarstwo hdźežkuli móžno dale dźěła“. Hubertus Heil wobžaruje, zo je CDU zakonskemu prawu ludźi na homeoffice zadźěwała. „Hewak bychmy nětko w tym dypku dale byli.“ Po jeho posudku su předewzaća móžnosće domjaceho dźěła loni nalěto intensiwnišo wužiwali hač nětko.