Załožba planuje wjacore nowe dźěłowe městna wutworić

Budyšin (SN/JaW). Załožba za serbski lud ma wjac pjenjez dóstać. Hinak hač Zwjazk a Braniborska – wobaj stej zwyšenju hižo přihłosowałoj –, so Sakska dliji. Přiwšěm z naćiska jeje etata wuchadźa, zo ma załožba wjac spěchowanja dóstać.

W předłoze za wobzamknjenje ho­spodarskeho plana w Sakskim krajnym sejmje mjez druhim rěka, zo ma zarjad załožby lětsa tři přidatne dźěłowe městna dóstać. Wupisali su hižo „městno społnomócnjeneho za digitalizaciju. Tón ma poručenja digitalizaciskeho koncepta, kotryž tuchwilu dopisujemy, zaměrnje zwoprawdźeć a wotpowědne akti­wity mjez institucijemi koordinować“, zdźěli na naprašowanje zamołwita za marketing w załožbje Hanka Budarjowa. Dale chcedźa w Budyšinje a Choćebuzu personalnu ka­pa­citu za marketing a zjawnostne dźěło­ wo městno rozšěrić a skónčnje „krute městno za Delnjoserbsku biblioteku w Choćebuzu wutworić, z čimž zaručamy wotewrjenske časy a zaměrne přewjedźenje zarjadowanjow“.