Łužiske liški Běła Woda –
EC Bad Nauheim 7:3 (4:0, 3:1, 0:2)
Pjeć króć za sobu běchu Łužiske liški naposledk hłowu wěšejo lodowu arenu wopušćili. Minjeny pjatk wječor pak móžachu skónčnje zaso jónu wyskać, dokelž su hosća z Bad Nauheima z poražku 3:7 na dompuć pósłali. Hrajerjo z Hessenskeje stejachu po třoch njedźelach zaso raz na lodźe, dokelž bě cyłe mustwo w karantenje. Hornjołužičenjo wočakowachu tuž wuwotpočowany team, kotryž chce zawěsće skónčnje zaso wo dypki wojować.
Tola dołha přestawka hosćom po wšěm zdaću tyła njebě. Wot wšeho započatka přewzachu mjenujcy domjacy ceptar. Nicholas Ross w 5. min. a trójce Kale Kerbashian (9., 12., 17.) postaraštaj so hižo w prěnjej třećinje wo jasny předskok. Někotre šansy mějachu tež hosćo, ale wrotar Mac Carruth wšitke třělwy dźeržeše. Ze změrowacym 4:0 podachu so Běłowodźanske liški do prěnjeje přestawki.