Šwaba w Hornjej Łužicy hnydom dwě lubosći namakał
Frank Schöbel je něhdy spěwał: „Du pěši wot sewjerneho hač južnemu čopej.“ Pěši drje Ronald Burkhardt po puću być njetrjebaše, za to pak je w dwanaće lětach zemju dźesać króć wobkružił a je dohromady nimale 6 000 hodźin w awće sedźał, zo móhł kónc tydźenja swojej dwě wulkej lubosći widźeć: mandźelsku Elku a město Budyšin. Ronald Burkhardt je pola Daimlera w Stuttgarće dźěłał; mjeztym něhdźe lěto je na wuměnku a móže sej nětko ze swojej mandźelskej w staroměšćanskej chěži Budyšina, w lětach 2012 do 2014 restawrowanej, lubić dać.
