Mnozy tuchwilu wot doma dźěłaja. Druzy su w karantenje. Zaso dalši, a tych njeje runjewon mało, su chori, kaž to w zymskim času je. Mnozy pak dyrbja schorjenja na koronu dla so ­lěkować.

Sym jej mjeno dała, po swójskim słodźe. Za wirus, kiž tuchwilu swět přemjetuje sym wjacore mjena słyšała. Za mnje rěka wona Miss C. Tak wěm na distancu z njej wobchadźeć. Minjene měsacy su mój wid na Miss C. změnili. Spočatnje, loni nalěto, jako zhonich wo serbskich promijach, kotřiž běchu so z koronu natykli, mějach to za sebje za chětro zdalene. Wšako jězdźachu woni po swěće, zo bychu swoje ­słužbne winowatosće spjelnili a so z wjele ludźimi zetkali. Ja pak přebywach doma we Łužicy.