Wobmjezowanja zjawneho žiwjenja koronawirusa dla podlěšene

Berlin (dpa/SN). Zwjazkowa kanclerka Angela Merkel (CDU) je dźensa w Zwjazkowym sejmje wčerawše zhromadne wobzamknjenja z ministerskimi prezidentami zwjazkowych krajow nastupajo wobmjezowanja koronawirusa dla zakitowała. Kaž hižo wčera, wona tež dźensa apelowaše, zo dyrbjeli ličby nowych infekcijow najprjedy dale woteběrać, doniž njemóhli dalše wolóženja zmóžnić.

Merkel bě so wčera z ministerskimi pezidentami na to dojednała, wobstejace wobmjezowanje kontaktow kaž tež zawrjenje hosćencow a hotelow zasadnje hač do 7. měrca podlěšić. Hladajo na strach hišće natykliwišich wirusowych mutacijow wona rjekny: „Chcemy wšitko činić, zo njepřińdźemy do noweje žołmy infekcijow.“ Dalše wolóženja budu hakle móžne, je-li tak mjenowana sydomdnjowska incidenca hač do 7. měrca stabilnje pod 35 spadnyła. Potom móhli wobchody, muzeje a galerije poněčim zaso wotewrěć. Wuwzaća płaća za frizerske salony, kotrež smědźa wot 1. měrca pod hygieniskimi wuměnjenjemi zaso dźěłać.