Huska (CS/SN). Něhdźe 60 ludźi wopominaše wčera w Husce serbskeho wučerja a přirodowědnika Michała Rostoka, kiž bě so před 200 lětami w Bělšecach narodźił. 40 lět skutkowaše wón jako wučer w Drječinje. Ze zahoritosću wěnowaše so slědźenju přirody. Njesprócniwje po swojej domiznje pućujo korespondowaše ze slědźerjemi zbliska a zdaloka. Snadnu mzdu wudawaše zwjetša za literaturu. Wobdarjenych šulerjow wón spěchowaše. Michał Rostok wosta njezmandźeleny a zemrě 1893. Na Hušćanskim kěrchowje su jeho pochowali.