Wojerecy (SN). Jednaćel Wojerowskeho zwěrjenca, Arthur Kusber, je so hladajo na najnowše postajenja trěbneho testowanja wopytowarjow ze zjawnym listom na sakskeho ministerskeho prezidenta Michaela Kretschmera (CDU) a ministerku za socialne naležnosće, Petru Köpping (SPD) wobroćił. W nim Kusber skorži, zo je po wulkim wjeselu připowědźeneho wotewrjenja zwěrjenca nětko zaso chětro přesłapjeny. Knježerstwo bě wukazało, zo smědźa jenož na koronawirus testowani do zwěrjenca přińć a při tym sebjetesty ludźi wotpokazało. Sćěh tutoho wukaza je, zo je ličba wopytowarjow na 57 procentow tak a tak hižo wot pandemije potrjecheneho lońšeho nalěća spadnyła. Kusber chcył wědźeć, na kotre wědomostne dopóznaća so knježerstwo při swojim rozsudźe zepěra, hdyž přechodźowanje pod hołym njebjom dowola, wopyt zwěrjenca we wonkownym wobłuku pak nic. Nowy testowanski centrum njedaloko zwěrjenca tež njepomha, dokelž je wón kónc tydźenja, hdyž ludźo skerje do coologiskeje zahrody přińdu, zawrjeny.