Waršawa (dpa/SN). Němska a Pólska chcetej swoje dobre poćahi najebać wobstejace problemy dale pohłubšić. Němsko-pólske susodstwo słuša „k najwjetšim europskim wudobyćam minjenych 30 lět“, rjekny zwjazkowy prezident Frank-Walter Steinmeier wčera po wuradźowanjach ze swojim pólskim kolegu w zastojnstwje Andrzejom Dudu we Waršawje, a to runje 30 lět po podpisanju němsko-pólskeho zrěčenju wo dobrym susodstwje. Duda potwjerdźi: „Smy dźensa jako wuslědk tychle 30 lět mjez sobu zwjazani – w najpozitiwnišim zmysle słowa.“ Steinmeier rjekny: „Njetrjebamy sej ničo rjane barbić w swojim susodstwje. Wězo mamy druhdy rozdźělne zajimy a wašnje zhladowanja.“ Hdyž pak zamołwići na so słuchaja a jedyn so wo tamneho prócuje, su problemy zwjetša rozrisajomne, Steinmeier doda.

Duda wuzběhny, zo stej Pólska a Němska kaž susodnej ratarskej statokaj, kotrejuž mějićelej so druhdy wadźitaj, zasadnje pak staj zwólniwaj, zo so jeju dźěći woženja. Zetkanje njeje žane mědlizanje, při kotrymž so njepřijomne temy wuzamkuja, pólski prezident podšmórny.