61 předewzaćow z regiona chce so zajimcam znowa předstajić

Biskopicy/Wojerecy/Radeberg/Budyšin /Kamjenc (SN/CoR). Tež lětsa přeprošeja města Budyskeho wokrjesa wobydlerjow pod hesłom „pózdnja słužba“, zo bychu so z tudyšim regionalnym hospodarskim žiwjenjom zeznajomili. Lětsa budźe akcija na dwěmaj terminomaj. Biskopicy, Wojerecy a Radeberg skića pjatk, 9. julija, zajimcam móžnosć, we wobłuku dohromady dźesać busowych shuttleow firmy wopytać, a tydźeń pozdźišo, 16. julija, na jědnaće busowych čarach w Budyšinje a Kamjencu.

Cyła akcija zmóžnja dohlad do dohromady 61 předewzaćow z jara rozdźělnym profilom, kotryž saha wot industrijneje techniki a ratarstwa přez hladanske słužby k wosebitym wobchodam. Kooperaciski projekt městow z wokrjesom Budyšin, z tudyšej a Kamjenskej Industrijnej a wikowanskej komoru (IHK), z Budyskim wokrjesnym rjemjeslnistwom, z transportnymaj firmomaj Regio-bus a Wojerowskej wobchadnej towaršnosću (VGH) a z Hornjołužiskej syću za fachowe mocy spěchuje sakske krajne knježerstwo.