Projekt KuBimobil wolóža přistup k zarjadnišćam kulturneho ruma

Zhorjelc (SN/bn). „KuBimobil je projekt mobility kulturneho ruma Hornja Łužica-Delnja Šleska, spěchowany wot sakskeho ministerstwa za wědomosć, kulturu a turizm. Z nim ma so přistup k poskitkam kulturneho kubłanja w kulturnym rumje wolóžeć.“ Takle wopisuje kulturny sekretar wokrjesa Zhorjelc Joachim­ Mühle naprawu dźělneho pjenježneho zarunanja transportnych kóštow na zdźěla dwurěčnej němsko-serbskej internetnej stronje . „Wobmjezowana mobilita přistup ke kulturje a kubłanju poćežuje, často přewulke jězbne kóšty situaciju njepolěpšeja. KuBimobil chce tule mjezotu přeprěčić a docpějomnosć kulturnišćow spěchować.“