Dojednanje wo financowanju załožby prěni raz wirtuelnje ratifikowali
Berlin/Budyšin (SN/JaW). Nowe, štwórte, statne zrěčenje wo financowanju Załožby za serbski lud je podpisane. Zwjazkowy minister za nutřkowne naležnosće, twar a domiznu Horst Seehofer (CSU), sakski ministerski prezident Michael Kretschmer (CDU) a braniborski ministerski prezident Dietmar Woidke (SPD) su je wčera – a to je scyła prěni raz – na wirtuelnej konferency podpisali. Wšitcy třo mějachu eksemplar zrěčenja před sobu ležo. Sćěhowało je zarjadowanje něhdźe 25 zajimcow, mjez nimi předsydka rady Załožby za serbski lud Susann Šenkec, direktor załožby Jan Budar, předsyda parlamentariskeje přirady Marko Šiman, předsyda Domowiny Dawid Statnik – woni běchu z Budyskeho Serbskeho domu zwjazani – a społnomócnjeny zwjazkoweho knježerstwa za wusydlencow a narodne mjeńšiny dr. Bernd Fabritius (CSU).