ST Hnašecy-Dobruša –
ST 1922 Radwor 3:4 (3:1)
Za hosći zasadźeni: Ch. Šěrak, Tausend – Reinecke, F. Šěrak, Grubert, Seiler, Glücklich, Pječak, Schöne, Wjacławk, Wróbl, Hančik, Nuk, Dej, Jendrewski, Schulze
Hižo pjatk wječor honješe trenar prěnjeho koparskeho mustwa Sportoweho towarstwa 1922 Radwor Mario Bischof swojich chowancow po lońšej premjerje druhi raz na Budysku wohnjowobornu wěžu horje a zaso dele. Wjacore razy dyrbjachu hrajerjo 126 schodźenkow přewinyć: hač w sprinće, z jednej abo woběmaj nohomaj wot schodźenka na schodźenk skakajo. To drje bě dračina, na kóncu pak bě kóždy z treningowej jednotku spokojom. Někotři mějachu hišće dny po tym myškoweho kocora.
Dwaj dnjej pozdźišo čakaše na Radworskich koparjow dalši dobry testowy přećiwnik z wokrjesneje wyšeje ligi. Woni nastupichu pola ST Hnašec-Dobruše. Z ćežkimi nohami startowachu hosćo do druheje testoweje hry, prjed hač nastupja njedźelu na 4. serbskim supercupje w Njebjelčicach.