Załožba za serbski lud spěchuje třoch łužisko-serbskich wuměłcow
Miłočicy (SN/MiR). Połčas rěka jutře wječor, hdyž 17 wuměłcow ze sydom krajow w Miłočanskej skale „Při Krabatowym kamjenju“ zhromadnje powječerja. Přetož za tydźeń njedźelu, 29. awgusta dopołdnja wot dźesaćich wočakuja čłonojo towarstwa Kamjenjak zaso zajimcow z bliska a daloka na zakónčenje lětušeje 15. mjezynarodneje rězbarskeje dźěłarnički. Mjez rězbarjemi a kamjenjećesarjemi su někotři, kotřiž běchu na jednej z předchadźacych dźěłarničkow skutkowali, kaž Willi Selmer z Delnjeje, Jörg Tausch ze srjedźneje a Gabriel Čornak z Hornjeje Łužicy, kotrychž spěchuje Załožba za serbski lud. Sydom dalšim wuměłcam zmóžnja kulturny konwent Hornja Łužica-Delnja Šleska lětuše wobdźělenje. Su to Ewa Pawlińska z Pólskeje, Rosalie Buchtal, Silvio Ukat a Olaf Klepzig z Němskeje, Šwicarka Simone Levy, Robert Alger a David Farell z Čěskeje, Bernhard Wiesner a Hermann Gschaider z Awstriskeje kaž tež Anian Kocharyn z Armenskeje. Sydom dalšich dźěła swójskeho zajima dla w skale.
