Choćebuz (SN/BŠe). Předewzaće Łužiska energija a milinarnje (LEAG) ze swojimi něhdźe 7 400 sobudźěłaćerjemi starosći so wuslědkow sonděrowanskich rozmołwow mjez SPD, Zelenymi a FDP dla. Minjeny pjatk předstajichu zastupjerjo stronow rezultaty a mjenowachu mjez druhim ručiši kónc wudobywanja brunicy. W idealnym padźe chcedźa jón hišće do lěta 2030 zwoprawdźić. Brunicowa komisija bě so po dołhim wotwažowanju na lěto 2038 dojednała.
Mjeztym je jasne, zo chcedźa zastupjerjo stron koaliciske jednanja zahajić. „We wuchodoněmskich brunicowych rewěrach so boja, zo so koaliciske strony za zažniši termin rozsudźa, bjez toho zo tajku móžnosć do toho wěcownje pruwuja“, zdźěli předwčerawšim nawoda předsydstwa LEAG dr. Helmar Rendez. „Njeje móžno sprócniwje docpěty kompromis politiskemu konsensej noweje knježerstwoweje koalicije woprować. Ludźo w brunicowych kónčinach maja tomu dowěrić móc, zo so zakoń wo skónčenju zmilinjenja na zakładźe brunicy zwoprawdźi.“
