Přihłosowanje a kritika k wuprajenjam w koaliciskim zrěčenju
Flensburg/Berlin (SN). W koaliciskim zrěčenju noweho knježerstwa SPD, FDP a Zelenych zakótwjenej wotrězkaj nastupajo mjeńšiny Federalistiska unija europskich narodnych mjeńšin (FUEN) zasadnje wita. Lěwica pak so kritisce wupraja.
W koaliciskim zrěčenju mjez druhim rěka: „Narodne mjeńšiny – danska mjeńšina, friziska ludowa skupina, němscy Sintojo a Romojo kaž tež serbski lud – su samozrozumliwy dźěl našeje mnohostronskeje towaršnosće.“ (str. 118) „Iniciatiwu Minority SafePack proaktiwnje podpěrujemy a ju w Němskej přesadźimy. Projekty k zachowanju a wuwiću mjeńšin, jich rěče a kultury dale wutwarimy.“ (str. 122)
„Jako třěšny zwjazk a zastupnica awtochtonych a narodnych mjeńšin witamy zwjeselacy wurjadne wuznaće k mjeńšinam, rěčnej mnohotnosći a k planowanemu rozšěrjenju zasadźenja zwjazkoweje republiki. Za škit narodnych mjeńšin w Europje je bytostne, zo su štyri připóznate narodne mjeńšiny w zrěčenju wuraznje mjenowane“, piše prezident FUEN Loránt Vincze w oficialnym stejišću organizacije mjeńšin.