Z hudźbu a literaturu za měr
Budyšin. Rotary-klub Bautzen-Budyšin, Budyski ekumeniski tachantski wobchod a ewangelsko-lutherska wosada swj. Pětra wuhotuja jutře, sobotu, w 17 hodź. beneficne zarjadowanje w Budyskej Pětrowej cyrkwi. Pod nawodom cyrkwinskeho hudźbneho direktora Michaela Vettera předstaja wjacori akterojo, mjez druhim čłonki a čłonojo ewangelskeho kantorstwa swj. Pětra kaž tež intendant Němsko-Serbskeho ludoweho dźiwadła Lutz Hillmann, hudźbu a teksty, wotpowědowace hesłu zarjadowanja „Wo lubosći a měrje“. Zastup je darmotny, pjenježny dary sposrědkuja Lwiwskej dobroćelskej załožbje St. Wolodymyr Fonds .
Folklora z labora
Budyšin. Załožba za serbski lud a Serbski ludowy ansambl přeprošatej njedźelu, 3. apryla, na zakónčace zarjadowanje folklorneje dźěłarnički „LAB 1 – Laboratorij za serbsku tradicionalnu hudźbu“ do Budyskeho Kamjentneho domu. Po prezentaciji wuslědkow wobdźělnikow koncertujetaj mentoraj projekta Maciej a Tadeusz Rychły. Zbytne zastupne lisćiki su při wječornej kasy na předań a płaća 12 eurow.
