Pólska a Němska chcetej situaciju při Wódrje zhromadnje wujasnić

Waršawa (dpa/SN). Pólske zarjady su po informacijach infrastrukturneho ministerstwa we Waršawje hižo kónc julija na pokazki mrěća rybow we Wódrje reagowali. W dnjach wot 26. do 28. julija su prěnje wotpowědne signale byli, na to su proby wody brali a mortwe ryby wułójili, to wuchadźa z kalendra pólskeho wodoweho zarjada, kotryž je ministerstwo pjatk na socialnej syći Twitter wozjewiło. Proby pokazuja, zo je njewšědnje mało kislika we wodźe.

W Němskej a Pólskej je hladajo na wobchadźenje pólskich zarjadow z mrěćom rybow wjele kritiskich słowow słyšeć. Tak kritizowaše předsyda frakcije Zelenych w braniborskim krajnym sejmje Benjamin Raschke informaciski rjećaz z Pólskeje. Pólski nawoda opozicije Donald Tusk wot liberalnokonserwatiwneje wobydlerskeje platformy (PO) rěčeše wo „jednym z najwjetšich wobswětowych skandalow zašłych lět – nic jenož w Pólskej.“