Podstupim (dpa/SN). Přepytowanja wody Wódry na jědojte substancy hišće wotzamknjene njejsu. „To móže hišće wjacore dny trać, doniž njejsmy wšitke maćizny, kotrež móhli tajku situaciju zawinować, dokładnje přepytowali“, rjekny braniborski wobswětowy minister Axel Vogel (Zeleni) wčera w informaciskim radiju RBB. „Krajny labor pak zaměrnje na tym dźěła.“ Pokiwy z Pólskeje, zo je so wysoko jědojta maćizna Mesitylen do Wódry dóstała, njejsu so z Braniborskeje strony sem wobkrućili, Vogel wuswětli. Mjeztym su wobšěrne přepytowanja wody zahajili. „A štož ryby nastupa, to dźe w prěnim rjedźe wo to wuslědźić, hač su labory w nich ćežkometale namakali“, wobswětowy minister rozłoži. „Z pólskeje strony su signale, zo njejsu ćežkometale a wosebje tež žane žiwe slěbro w rybach našli, štož wšak tež změruje.“