Drježdźany (dpa/SN). Sakska chce dale a bóle wupřestrěću afriskeje swinjaceje mrětwy zadźěwać. Zo je posledni třeći wotrězk škitneho płota na mjezy do Pólskeje dotwarjeny, zdźěli sakske socialne ministerstwo minjeny pjatk. „Z tym je hranica wot Braniborskeje hač do Čěskeje z dwójnym płotom zawěsćena.“

„Zawrěće škitneho koridora podłu ­pólskeje hranicy tomu zadźěwa, zo so inficěrowane dźiwje swinje přez Nysu do Sakskeje dóstanu. Runje tak zaruča płót wěstu škitnu conu“, rozłoži statny sekretar Sebastian Vogel. Z dotwarjenymi koridorami hodźi so lokalnje wupřestrěću mrětwy zadźěwać. „Wěmy, zo je to ćežko. Ale smy optimistiske, wšako mějachmy loni pady přewažnje jenož w inficěrowanych wobłukach“, statny sekretar měni.

Afriska swinjaca mrětwa je wirusowa infekcija, na kotrejž zwěrjata zemrěja. Jenož domjace a dźiwje swinje móžeja schorjeć. Dotal njedawa hišće žane šćěpiwo přećiwo chorosći.