Na sakskich krajnych mišterstwach młodźiny w sportowej disciplinje bowling minjeny kónc tydźenja w Lipsku wotrumowachu wobdźělnicy z Budyskeho wokrjesa wjele medaljow. Hrali su najprjedy šěsć hrow w předkole. Dobyćerske teamy dyrbjachu potom w finalu znowa swoje najlěpše dać. W młodźinje B zwoprawdźištej Emily Beute a Lys Leann Lobstedt wot sportoweho towarstwa BC Sakska 90 Budyšin to njemóžne a dobyštej swojej finalnej hrě. Faworitce Carlotta Heinel a Marie Bachmann z Kamjenicy dyrbještej so ze slěbornej medalju spokojić. Nic mjenje napjate bě finale mjez holcami młodźiny A. Biskopičanka Pia Schink a jeje Budyska partnerka njeseštej zdobom hišće ćežke brěmjo zakitowarkow titula. Tola wonej wotpowědowaštej swojej róli a steještej na kóncu dnja na hornim schodźenku podesta. Zwjeselace tež, zo běše direktnje pódla dobyćerkow Budyšanka Johanna Schimke, kotraž ze swojej Kamjeničanskej partnerku Charlie Marie Nordmann wicemišterstwo doby. Wjele zboža!