Hišće pjatk pisachu Serbske Nowiny w sportowych pokiwach, zo by so dyrbjał dźiw stać, bychu-li wolejbulisća ST Viktorije Worklecy runje na tutym hrajnym dnju trěbne dypki docpěli, zo bychu sej z tabulkoweje pincy wulězli. Pola přećiwnikow jednaše so přiwšěm wo načolnika sakskeje klasy z Łužnicy a dotalneho štwórteho tabulki Motor Mickten. K tomu přińdźe, zo dwaj stajnej hrajerjej swójbnych přičin dla pobrachowaštaj. Přećiwo wšěm tutym negatiwnym předznamjenjam pak steješe kruta wola Worklečanow, na kóždy pad dypkować a zestupne městna wopušćić.

Viktoria Worklecy –

Motor Mickten II: 3:1 (19:25, 25:23, 25:22, 29:27)

Kóždy w mustwje spyta, to najlěpše dać. W prěnjej sadźbje wjedźeše tuta napjatosć bohužel k wulkej nerwoznosći, tak zo dyrbjachu domjacy stajnje za jasnym zastatkom běžeć a skónčnje jasnu sadźbowu poražku 19:25 připóznać. Wosebje hłowneho nadběhowarja Robbyja Andersa njemóžachu tak prawje kontrolować. Spěšnje bu analyzowane, zo běchu poprawom jenož njetrjebawše swójske zmylki k tutomu wuslědkej wjedli.