„Tutón turněr njebě ničo za słabe čuwy lubowarjow kulowateje kože, kotřiž dźerža ke koparskim přećelam z Worklec.“ Toho běchu sej wjacori Worklečanscy wjesni koparjo na tak mjenowanym Asia Bistro Sunrise-cupje za wólnočasne mustwa w Heidenauwje přezjedni.
Hosćo z Worklec startowachu špatnje do wurisanja. Přećiwo ,,Bierussiji Nünchritz“ dóstachu so Worklečenjo njetrjebawši do zastatka. Z wothwizdanjom hry wjedźeše wrotar David Matik bul tež hišće njezbožownje z hłowu k 0:2 do swójskeho saka.
Worklečanski motor pak so w druhej hrě přećiwo ,,ST Wampe“ pomału sćopli. Dwójny třělc Luca Šuster, kiž swjećeše swój debit za čorne košle, a rutinjej Patrick Preusche wobradźištaj Worklečanam solidne nawjedowanje. Něšto wokomikow do wothwizdanja skrótši kontrahent hišće na 3:1.