Wodźenje po lěhwje za jatych

Halštrowska Hola. Hród a měšćanski muzej Wojerecy wuhotujetej zajutřišim, njedźelu, zjawne wodźenje po něhdyšim lěhwje za wójnskich jatych Elsterhorst blisko Narća. W barace bywšeho lacareta chcedźa fachowcy „zajimcam stawizny lěhwa z časa nacionalsocializma hač do jeho zawrjenja w lěće 1947 sposrědkować“. Něhdźe połdrahodźinske wodźenje započnje so w 11 hodź., popłatk wučinja pjeć eurow resp. potuńšeny tři eura. Organizatorojo proša wo přizjewjenje, a to telefonisce pod čo. 03571 20937500.

Informuja wo naslědnej energiji

Njebjelčicy. Wysoka šula Žitawa/Zhorjelc, Fraunhoferowy institut a gmejna Njebjelčicy přeproša póndźelu, 13. měrca, na informaciske zarjadowanje za wobydlerjow. We 18.30 hodź. rozjimataj referent Sakskeho statneho ministerstwa za energiju, škit klimy, wobswět a ratarstwo Dirk Schmidt a Marcel Bellmann z energijoweje agentury wokrjesa Budyšin „Studiju móžnosćow za wnučkokmane zastaranje z energiju“. Zjawna diskusija ma slědować. Něhdźe dwuhodźinske zarjadowanje wotměje so na gmejnskej žurli w Njebjelčicach.