ST Póst Germania Budyšin –

ST Radwor 2:0 (1:0)

Zestawa hosći: Grenzemann – Reinecke (18. Schulze), Měrćink, Pěčak, Paška (85. Seiler), Johannes Wjacławk, Schöne (73. Hetaš), Nuk, Grubert, Wjeńka, Šnajder (73. Jakub Wjacławk)

Po wuspěchu zeleny štwórtk steješe hnydom dalši sylny přećiwnik před Radworskimi koparjemi – Póst Budyšin. Tohodla přijědźechu hosćo ze šěrokej hrudźu do Budyšina.

Ale hižo po zahwizdanju bě spóznać, zo chcychu sej Budyšenjo dypki doma zdźeržeć. Hosćićeljo mějachu wjace hrajnych podźělow a móžachu bul lěpje při sebi dźeržeć. Tola Radworčenjo wobstajnje derje zakitowachu a wulke šansy njedowolichu. Po róžku w 24. min. wotfalšowa Lenny Schöne bul njezbožownje do swójskich wrotow a dari přećiwnikej nawjedowanje.

Po znowazahwizdanju dźěše hra runje tak dale kaž do přestawki. Nětko měješe Radwor něšto wjace šansow, kotrež pak njewužiwaše. Za neutralneho přihladowarja bě grawoćiwje přihladować, kak bule přez wrota lětaja. We 78. min. móžeše Budyšin na 2:0 zwyšić. Krótko do wothwizdanja měješe Jakub Wjacławk wulku šansu k 2:1, ale třělwa bu runje hišće na wrotowej liniji wujasnjena.