Přihoty na festiwal po „wupruwowanym koncepće“, ale „bjez rutiny“

Chrósćicy (SN/bn). Dohromady 17 kulturnych cyłkow wuhotuje po aktualnym stawje planowanja na cyłkownje jědnaće jewišćach w Budyšinje, Hochozy a Chrósćicach wot 6. do 9. julija XIV. mjezynarodny folklorny festiwal Łužica. Kaž Marko Kowar, předsyda přihotowanskeho wuběrka festiwal organizowaceje Domowiny, wčera na nowinarskej rozmołwje w Chróšćanskim gmejnskim zarjedźe podšmórny, złožuja so nastupajo přihoty kaž tež wotběh „na wupruwowany koncept. Po štyrilětnej přestawce pak wo rutinje rěčeć njemóžemy. Po pandemiji njebě wěste, kotři ze zwučenych partnerow chcedźa a móža so lětsa wobdźělić“, Kowar mjez druhim skedźbniwši na změny w zarjadnistwomaj w Budyšnje a Hochozy doda a zjima: „Poprawom nimale cyle zwoprědka započnjemy.“