77. serbski ewangelski cyrkwinski dźeń budźe sobotu a njedźelu w Slepjanskej wosadźe

Lětnemu hesłu „Ty sy Bóh, kiž mje widźi“ (1 Mójzas 16,13) wěnuje so 77. serbski ewangelski cyrkwinski dźeń 10. a 11. junija. Po lětach 1958, 1967, 1991, 2011 a 2016 budźe wón znowa w Slepom. Wo přihotach, wobsahach a předwjeselach je so Andreas Kirschke z fararku Jadwigu Malinkowej rozmołwjał. Wona wot lěta 2014 w Slepjanskej wosadźe skutkuje.

Fararka Malinkowa, na plakaće za cyrkwinski dźeń 2023 steji Ochranowske lětne hesło w slepjanšćinje. Je to wotpohlad abo připad?

To je wězo wotpohlad. Serbski ewangelski cyrkwinski dźeń drje je cyrkwinski dźeń za wšu Łužicu. Dźe wo to ze wšelakeje perspektiwy widźeć a widźani być. A lětsa chcemy na Slepjanski region hladać. Wšako su tamniši Serbja ze swojimi swojoraznymi stawiznami, rěču, kulturu, pěstowanjom tradicijow ludowych nałožkow kaž móst mjez Hornjej a Delnjej Łužicy. To ma plakat zwuraznjeć. Rodźena Miłoražanka Christin Noack je so wo čerstwe, žiwe wuhotowanje postarała. Jej za to wutrobny dźak.

Kotru tradiciju ma cyrkwinski dźeń we Wašej wosadźe?