Porno žiwej adwentnej protyce we Wojerowskim starym měsće je tute zarjadowanje w Nowym měsće Wojerec poměrnje nowe. Zarjadowarka je Kulturna fabrika tež z financnej podpěru z dawkowych srědkow.
Hłowny organizator Christian Völker-Kieschnick je tute wosebite zarjadowanje iniciěrował, dokelž su „mnozy wobydlerki a wobydlerjo z Noweho města přeco zaso zrudni přez móst na stare město hladali. A su sej přeli, zo so tajka akcija tohorunja w nowšim dźělu města wotměje“, rozprawja Wojerowčan wo swojich nazhonjenjach. Iniciator znaje tule rjanu tradiciju hižo ze swojeho dźěćatstwa a wobdźiwuje wobstajny, njesprócniwy angažement wótca „protyki“ a jeje hłowneho organizatora Torstena Vogela.
Mjez 1. a 22. decembrom mějachu na dohromady 18 dnjach wobchodźomne „durčka“, za kotrymiž překwapjenja čakachu. Što to konkretnje bě, zhonichu wobdźělnicy wězo hakle na wotpowědnym wječoru. Mnohe „durčka“ běchu kołowokoło Bonhoefferoweje njedaloko Łužiskeho centera.
