Nowe lěto hladaja wobydlerjam Němskeje mnohe změny do domu

Berlin (dpa/SN). Někotre z tutych změnow su z financielnymi polěpšenjemi zwjazane, druhe skerje z wjetšimi wušparanjemi. Pjenježne změny potrjechja na přikład zasłužbowe dawki. Tam zwyši so zakładny swobodny pjenjez na 11 604 eurow. Za někotrych staršich so lěto derje njezapočina: Staršiski pjenjez płaći so wot spočatk lěta jenož hišće na pory, kotrež maja maksimalnu zasłužbu 200 000 eurow. Dospołnje pak tute změny hišće wobzamknjene njejsu a maja tež jenož za staršich płaćić, kotrychž dźěćo je so po 31. měrcu 2024 narodźiło. Tež hdyž so powšitkowna minimalna mzda zwyši, smědźa so přistajeni w hladanskim sektoru wo hišće wjace pjenjez wjeselić. Za fachowych hladarjow stupa hodźinska mzda na 19,50 eurow. A tež wučomnicy smědźa so přez wyšu mzdu wjeselić – minimalna mzda w prěnim wukubłanskim lěće stupa wo 4,7 procentow na 649 eurow na měsac.