Šef statneje kenclije na farje podpěru za kongres Europasion potwjerdźił

Chrósćicy (SN/mb). Nětko je wusahowacy mjezynarodny wjeršk klětušeho jubilejneho lěta w Chrósćicach zaručeny: Saksa budźe kongres Europasion spěchować. Klětu wopominaja 800 lět prěnjeho pisomneho naspomnjenja Chróšćanskeje wosady kaž tež wsow Chrósćicy a Prawoćicy. Zdobom so kongres Europasion w Chrósćicach wotměje. Chróšćanske pasionske zjednoćenstwo, kotrež je sekcija Towarstwa Cyrila a Metoda (TCM), pasion znowa předstaji a třista hosći-wuhotowarjow pasiona ze 16 krajow na zetkanje wočakuje. Spočatk tohole lěta je oficialna zdźělenka wo spěchowanju ze stron Sakskeje we wysokosći 77 300 eurow dóšła, kotruž je Oliver Schenk (CDU), šef sakskeje statneje a statny minister za naležnosće Zwjazka a Europy, wčera wječor na Chróšćanskej farje swjatočnje wobkrućił.