Zwjazkowy zasłužbny rjad Ludmili Budarjowej a Janej Bartej spožčili

Drježdźany (SN/mb). Njeličomne zarjadowanja je Ludmila Budarjowa organizowała. Wčera pak je so wjeseliła, zo smědźeše bjez swójskeje prócy přitomna być, kaž Serbskim Nowinam praješe. Hromadźe ze synom Janom, přichodnej dźowku Madleńku a z wnučkomaj Filipom a Kitom poda so do sakskeje statneje kenclije w Drježdźanach. Swójbna skupinka běše zdobom rjany dopokaz za posrědkowanje maćeršćiny přichodnymaj generacijomaj. W statnej kencliji je ministerski prezident Michael Kretschmer (CDU) jej a Janej Bartej w nadawku zwjazkoweho prezidenta zwjazkowy zasłužbny rjad spožčił. Budarjowej, dokelž „so zaměrnje a rozhladniwje za dwurěčne kubłanje wot pěstowarnje hač do uniwersity zasadźowaše“, kaž wopisuja jeje „angažement za zachowanje serbšćiny přez wjele lět“, mjez druhim jako załoženska čłonka a předsydka Serbskeho šulskeho towarstwa (SŠT).