Dale z třomi serbskimi radźićelemi

wutora, 11. junija 2024
artikl hódnoćić
(0 )

W nowym Budyskim wokrjesnym sejmiku budu znowa třo serbscy wokrjesni radźićeljo. Dawid Statnik (CDU) a Jan Budar (Serbske wolerske zjednoćenstwo/SWZ) staj mandat zakitowałoj. Jako třeći wróći so Alojs Mikławšk (CDU) do sejmika, kotremuž bě hižo hač do předposlednjeje wólbneje periody přisłušał. Wšitcy třo buchu w samsnym wólbnym wokrjesu 7 wuzwoleni.

Budyšin (SN/at). Wot stronskich zajimow njewotwisny wokrjesny radźićel móže serbske zajimy dale w Budyskim wo­krjesnym sejmiku zastupować. Jan Budar njeje jenož mandat Serbskeho wolerskeho zjednoćenstwa zakitował, wón je z 843 hłosami swój wuslědk z lěta 2019 (508) samo polěpšił. Alojs Mikławšk bu z 3 715 hłosami wuzwoleny, Dawid Statnik z 2 100, 297 mjenje hač před pjeć lětami. W serbskich komunach wólbneho wokrjesa 7 bě CDU znowa najsylniša strona. Najwjetšu dowěru mějachu wolerjo do SWZ z 15,6% hłosow w Chrósćicach. Cyłkownje pak je SWZ ze 4 621 porno 6 065 lěta 2019 nimale štwórćinu hłosow zhubiło.

Straty za Lěwicu wuskutkowachu so tež na rezultat kandidata Hajka Kozela we wólbnym wokrjesu 4. Docpětych 1 096 hłosow (2019: 1 958) njedosahaše za wospjetny mandat w sejmiku.

wozjewjene w: Kraj a swět
Prošu přizjewće so, chceće-li komentar podać

nowostki LND